بين الشك واليقين
نقطة على السطر
وفاصلة على المفصل
بين الحق والباطل
الايام تتماطل
والغاشي مغشي حاصل
وانا في اطريقي
مرة نتعثر وانطيح
مرة واقف نتامل
والطريق اعريضة اطويلة
خاصها اوناسى
وانا اوحيد فيها نتناسى
شي امواكب الركب
شي يتعثر في اجلايلو
وخيبت الوحدانية
يا لطيف يا لطيف
وابنادم ما يرحم
كلها ورامي عينيه
ما كاين غير جيب يا فم
وشي طالق ودنيه
والرحلة اطويلة
خاصها زاد
وانا لمزيودة اخوات
حتى اجلايلي اتنفضات
وكاتم في نفسي
وملازم الصمت
كل مرة واتنوض اعجاجة
اتهزها ريح لفراجة
والطريق اطويلة
شي غادي ويزحف
شي بارك يهتف
وشي بكلامو يخرف
وانا مديها في جوعي
انكايس على اضلوعي
وابنادم غي امجندر
بلا بلا بلا
غي بارك ويهضر
وهاز الدقة في الصدر
الدنيا غاوية
العيشة ما امساوية
ولعقول ما امتاوية
كلها فين ينثر
شي امعفر
وشي امكمل بالصبر
الطريق ما امساوية
فيها لويات واعقابي
مرة مرة
على جنب الطريق
كلب مسعور اطليق
ينهش يعض ينبح
يفرشخ يقتل يدبح
واتغيرت الاية
وصبحات للبعض حجاية
.
الشاعر والزجال الزموري مصطفى امزيل
المعازيز ........
2015/10/12
المعازيز 24
.
ليست هناك تعليقات:
إرسال تعليق